ಸಾಮಾನ್ಯವಾಗಿ ಮೆಟ್ರೋಗಿಂತ ಬಸ್ ಪ್ರಯಾಣ ಅಗ್ಗವಾಗಿರುತ್ತದೆ ಎಂಬ ನಿರೀಕ್ಷೆ ಪ್ರಯಾಣಿಕರಲ್ಲಿರುತ್ತದೆ. ಆದರೆ ಹೊಸ ದರಪಟ್ಟಿ ಪ್ರಕಾರ ಕೆಲವು ಮಾರ್ಗಗಳಲ್ಲಿ ಬಿಎಂಟಿಸಿ ಪ್ರಯಾಣವೇ ದುಬಾರಿಯಾಗಿದೆ. ಮೆಜೆಸ್ಟಿಕ್‌ನಿಂದ ವಿಜಯನಗರಕ್ಕೆ ನಮ್ಮ ಮೆಟ್ರೋದಲ್ಲಿ 20 ರೂಪಾಯಿ ದರವಿದ್ದರೆ, ಬಿಎಂಟಿಸಿ ಬಸ್‌ನಲ್ಲಿ 25 ರೂಪಾಯಿ ಪಾವತಿಸಬೇಕು. ಅದೇ ರೀತಿ ಮೆಜೆಸ್ಟಿಕ್‌ನಿಂದ ಜಯನಗರಕ್ಕೆ ಮೆಟ್ರೋ ದರ 30 ರೂಪಾಯಿ ಇದ್ದರೆ, ಬಸ್ ಪ್ರಯಾಣ ದರ 35 ರೂಪಾಯಿಗೆ ಏರಿಕೆಯಾಗಿದೆ.
ಹವಾನಿಯಂತ್ರಿತ ವಜ್ರ ಬಸ್‌ಗಳ ಪ್ರಯಾಣ ದರವನ್ನೂ ಪರಿಷ್ಕರಿಸಲಾಗಿದೆ. ದೂರಕ್ಕೆ ಅನುಗುಣವಾಗಿ 5ರಿಂದ 15 ರೂಪಾಯಿವರೆಗೆ ದರ ಹೆಚ್ಚಳ ಮಾಡಲಾಗಿದೆ. ಸಿಲ್ಕ್ ಬೋರ್ಡ್‌ನಿಂದ ಹೆಬ್ಬಾಳಕ್ಕೆ ಈ ಹಿಂದೆ 55 ರೂಪಾಯಿ ಇದ್ದ ದರ 65 ರೂಪಾಯಿಗೆ ಏರಿಕೆಯಾಗಿದೆ. ಬನಶಂಕರಿಯಿಂದ ಐಟಿಪಿಎಲ್‌ಗೆ 50ರಿಂದ 60 ರೂಪಾಯಿ ಹಾಗೂ ಕೆ.ಆರ್. ಪುರಂನಿಂದ ಸಿಲ್ಕ್ ಬೋರ್ಡ್‌ಗೆ 40ರಿಂದ 55 ರೂಪಾಯಿಗೆ ಹೆಚ್ಚಳವಾಗಿದೆ. ಮೆಜೆಸ್ಟಿಕ್‌ನಿಂದ ಅತ್ತಿಬೆಲೆಗೆ 60 ರೂಪಾಯಿ ಇದ್ದ ದರ 70 ರೂಪಾಯಿಗೆ ತಲುಪಿದೆ.
ಈ ವರ್ಷದ ಫೆಬ್ರವರಿಯಲ್ಲಿ ನಮ್ಮ ಮೆಟ್ರೋ ಪ್ರಯಾಣ ದರವನ್ನೂ ಸುಮಾರು ಶೇ.5ರಷ್ಟು ಹೆಚ್ಚಿಸಲಾಗಿತ್ತು. ಕನಿಷ್ಠ ದರ 10ರಿಂದ 11 ರೂಪಾಯಿಗೆ ಹಾಗೂ ಗರಿಷ್ಠ ದರ 90ರಿಂದ 95 ರೂಪಾಯಿಗೆ ಏರಿಕೆಯಾಗಿತ್ತು. ಇದೀಗ ಬಿಎಂಟಿಸಿ ದರ ಏರಿಕೆಯೂ ಜಾರಿಯಾಗಿರುವುದರಿಂದ ಬೆಂಗಳೂರಿನ ಸಾರ್ವಜನಿಕ ಸಾರಿಗೆ ಪ್ರಯಾಣಿಕರ ಖರ್ಚು ಮತ್ತಷ್ಟು ಹೆಚ್ಚಾಗಿದೆ. ಪ್ರತಿದಿನ ಕೆಲಸ, ಶಿಕ್ಷಣ ಹಾಗೂ ಇತರ ಉದ್ದೇಶಗಳಿಗಾಗಿ ಬಸ್ ಅವಲಂಬಿಸಿರುವ ಜನರಿಗೆ ಈ ದರ ಏರಿಕೆ ದೊಡ್ಡ ಹೊರೆಯಾಗಿದೆ.
