ಉತ್ತಮ ಕೆಲಸ ಹಾಗೂ ಹೆಚ್ಚಿನ ಸಂಬಳದ ಆಮಿಷಕ್ಕೆ ಒಳಗಾಗಿ ವಿದೇಶಕ್ಕೆ ತೆರಳಿದ ನೂರಾರು ಭಾರತೀಯ ಯುವಕರು ಕಾಂಬೋಡಿಯಾದಲ್ಲಿ ಸೈಬರ್ ವಂಚನೆ ಜಾಲ ಹಾಗೂ ಜೈಲು ವಾಸದ ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಉದ್ಯೋಗ ಕೊಡಿಸುವುದಾಗಿ ನಂಬಿಸಿ ಏಜೆಂಟರು ಯುವಕರನ್ನು ಅಕ್ರಮ ಕಂಪನಿಗಳಿಗೆ ಮಾರಾಟ ಮಾಡುತ್ತಿದ್ದು, ಇದೀಗ ಹಲವರು ಜೈಲು ಸೇರಿರುವ ಆತಂಕಕಾರಿ ಸಂಗತಿ ಬೆಳಕಿಗೆ ಬಂದಿದೆ.

ರಾಜಸ್ಥಾನದ ಅಲ್ವಾರ್ ಮೂಲದ ಪ್ರದೀಪ್ ಕುಮಾರ್ ಎಂಬ ಯುವಕನ ಪ್ರಕರಣ ಈ ಇಡೀ ಜಾಲದ ಕರಾಳ ಮುಖವನ್ನು ತೆರೆದಿಟ್ಟಿದೆ. ಕಂಪ್ಯೂಟರ್ ಸಂಬಂಧಿತ ಉದ್ಯೋಗದ ಭರವಸೆ ಮೇರೆಗೆ ಮಲೇಷ್ಯಾಕ್ಕೆ ತೆರಳಿದ್ದ ಪ್ರದೀಪ್ ಅವರ ಪಾಸ್ಪೋರ್ಟ್ ಹಾಗೂ ವೀಸಾವನ್ನು ಏಜೆಂಟರು ಕಿತ್ತುಕೊಂಡಿದ್ದರು. ಆ ಬಳಿಕ ಅವರನ್ನು ಅಕ್ರಮವಾಗಿ ಕಾಂಬೋಡಿಯಾದ ಸಿಹಾನೌಕ್ವಿಲ್ಲೆಗೆ ಕಳುಹಿಸಲಾಗಿತ್ತು. ಸದ್ಯ ಪ್ರದೀಪ್ ಕಾಂಬೋಡಿಯಾ ಪೊಲೀಸರ ವಶದಲ್ಲಿದ್ದು, ಅವರ ಬಿಡುಗಡೆಗಾಗಿ ಅಪರಿಚಿತರು 40 ಲಕ್ಷ ರೂಪಾಯಿ ಬೇಡಿಕೆ ಇಟ್ಟಿದ್ದಾರೆ ಎಂದು ಕುಟುಂಬಸ್ಥರು ಆರೋಪಿಸಿದ್ದಾರೆ.

ಜೈಲಿನಲ್ಲಿ ಅಮಾನವೀಯ ಕಿರುಕುಳ:
ಮಗನ ಸ್ಥಿತಿ ತಿಳಿಯಲು ಕಾಂಬೋಡಿಯಾ ಜೈಲಿಗೆ ತೆರಳಿದ್ದ ಪ್ರದೀಪ್ ಅವರ ತಂದೆ ವಿಜಯ್ ಕುಮಾರ್ ಕಣ್ಣೀರಿನ ಕಥೆಯನ್ನು ಬಿಚ್ಚಿಟ್ಟಿದ್ದಾರೆ. ಜೈಲಿನಲ್ಲಿ ಪ್ರದೀಪ್ಗೆ ದಿನಕ್ಕೆ ಎರಡು ಬಾರಿ ಕೇವಲ ಒಂದು ಕಪ್ ಅನ್ನ ಮತ್ತು ಕುಂಬಳಕಾಯಿ ರಸ ನೀಡಲಾಗುತ್ತಿತ್ತು. ಅಲ್ಲದೆ, ಆತನಿಗೆ ಬಲವಂತವಾಗಿ 18 ಬಾರಿ ಇಂಜೆಕ್ಷನ್ ನೀಡಲಾಗಿತ್ತು ಎಂದು ವರದಿಯಾಗಿದೆ. ಸದ್ಯ ಭಾರತೀಯ ರಾಯಭಾರ ಕಚೇರಿ ಹಾಗೂ ವಿದೇಶಾಂಗ ವ್ಯವಹಾರಗಳ ಸಚಿವಾಲಯದ ನೆರವನ್ನು ಕುಟುಂಬ ಕೋರಿದೆ.

ದೇಶಾದ್ಯಂತ ವಿಸ್ತರಿಸಿರುವ ವಂಚನೆ ಜಾಲ:
ಕೇವಲ ರಾಜಸ್ಥಾನ ಮಾತ್ರವಲ್ಲದೆ ಕೇರಳ, ತಮಿಳುನಾಡು, ಆಂಧ್ರಪ್ರದೇಶ ಮತ್ತು ಉತ್ತರ ಪ್ರದೇಶದ ಹಲವು ಭಾರತೀಯರು ಈ ಜಾಲಕ್ಕೆ ಸಿಲುಕಿದ್ದಾರೆ. ಕೇರಳದ ತಿರುವನಂತಪುರಂ ಮೂಲದ ದಂಪತಿ ಸೇರಿದಂತೆ ಐವರು ಕಾಂಬೋಡಿಯಾ ಜೈಲಿನಲ್ಲಿದ್ದಾರೆ. ಬ್ಯಾಂಕಾಕ್ ಅಥವಾ ವಿಯೆಟ್ನಾಂಗೆ ಉದ್ಯೋಗದ ನಿರೀಕ್ಷೆಯಲ್ಲಿ ತೆರಳುವವರನ್ನು ಏಜೆಂಟರು ಅಕ್ರಮವಾಗಿ ಕಾಂಬೋಡಿಯಾಕ್ಕೆ ಸಾಗಿಸುತ್ತಿದ್ದಾರೆ.
ಸಾವಿರಾರು ಡಾಲರ್ ಸಂಬಳದ ಆಮಿಷ:

ಈ ವಂಚಕ ಕಂಪನಿಗಳು ಭಾರತೀಯ ಪುರುಷರಿಗೆ ತಿಂಗಳಿಗೆ ಸುಮಾರು 1,000 ಡಾಲರ್ (ಅಂದಾಜು 95 ಸಾವಿರ ರೂ.) ಹಾಗೂ ಮಹಿಳೆಯರಿಗೆ 2,500ರಿಂದ 4,000 ಡಾಲರ್ (ಅಂದಾಜು 2.37 ಲಕ್ಷದಿಂದ 3.8 ಲಕ್ಷ ರೂ.) ಸಂಬಳದ ಆಮಿಷವೊಡ್ಡುತ್ತವೆ. ಅಲ್ಲಿಗೆ ಹೋದ ಬಳಿಕ ದೊಡ್ಡ ಪ್ರಮಾಣದ ಆನ್ಲೈನ್ ವಂಚನೆ ಮತ್ತು ಸೈಬರ್ ಕ್ರೈಂ ದಂಧೆ ನಡೆಸುವಂತೆ ಒತ್ತಾಯಿಸಲಾಗುತ್ತದೆ. ಮಾತು ಕೇಳದಿದ್ದರೆ ಹೋಟೆಲ್ ರೂಂಗಳಲ್ಲಿ ಕೂಡಿಹಾಕಿ ಚಿತ್ರಹಿಂಸೆ ನೀಡಲಾಗುತ್ತದೆ ಎಂದು ಸಹೋದ್ಯೋಗಿಗಳು ತಿಳಿಸಿದ್ದಾರೆ.

ಕಾಂಬೋಡಿಯಾ ಗೃಹ ಸಚಿವಾಲಯದ ಅಧಿಕೃತ ಮಾಹಿತಿಯ ಪ್ರಕಾರ, ಕಳೆದ ಮೂರು ವರ್ಷಗಳಲ್ಲಿ (ಸೆಪ್ಟೆಂಬರ್ 2023 ರಿಂದ ಸೆಪ್ಟೆಂಬರ್ 2026 ರವರೆಗೆ) ಒಟ್ಟು 1,921 ಭಾರತೀಯರನ್ನು ಕಾಂಬೋಡಿಯಾದಿಂದ ವಾಪಸ್ ಭಾರತಕ್ಕೆ ಕಳುಹಿಸಲಾಗಿದೆ. ಇವರಲ್ಲಿ 575 ಮಂದಿ ಕಾಂಬೋಡಿಯಾ, ಅಮೆರಿಕ ಮತ್ತು ಭಾರತದ ಜನರನ್ನು ಗುರಿಯಾಗಿಸಿಕೊಂಡು ಅಂತಾರಾಷ್ಟ್ರೀಯ ವಂಚನೆ ನಡೆಸುತ್ತಿದ್ದ ಸೈಬರ್ ಕ್ರೈಂ ಕಂಪನಿಗಳೊಂದಿಗೆ ನೇರ ಸಂಪರ್ಕ ಹೊಂದಿದ್ದರು ಎನ್ನಲಾಗಿದೆ.
ಪ್ರಸ್ತುತ ಕಾಂಬೋಡಿಯಾ ಜೈಲಿನಲ್ಲಿ ಎಷ್ಟು ಭಾರತೀಯರಿದ್ದಾರೆ ಎಂಬ ಬಗ್ಗೆ ಸರ್ಕಾರದಿಂದ ನಿಖರ ಮಾಹಿತಿ ಲಭ್ಯವಾಗಿಲ್ಲದಿದ್ದರೂ, ವಿದೇಶಾಂಗ ಇಲಾಖೆಯು ಇಂತಹ ನಕಲಿ ಏಜೆಂಟರ ಬಗ್ಗೆ ಎಚ್ಚರಿಕೆ ವಹಿಸುವಂತೆ ಸಾರ್ವಜನಿಕರಲ್ಲಿ ಮನವಿ ಮಾಡಿದೆ.