ಮಹಾಭಾರತದ ಕಾಲದ ರಥದಂತೆ ಇದರ ವಿನ್ಯಾಸವಿದ್ದು, ಸಾರಥಿಯಾಗಿ ಶ್ರೀಕೃಷ್ಣ ಗೀತೋಪದೇಶ ಮಾಡುತ್ತಿರುವ ಹಾಗೂ ಅರ್ಜುನ ಯೋಧನಾಗಿ ನಿಂತಿರುವ ಭಂಗಿಯನ್ನು ಬಹಳ ಆಕರ್ಷಕವಾಗಿ ಮರುಸೃಷ್ಟಿಸಲಾಗಿದೆ. ರಥದ ಮುಂಭಾಗದಲ್ಲಿ ಓಡುತ್ತಿರುವಂತೆ ಕಾಣುವ ಐದು ಬಿಳಿ ಕುದುರೆಗಳು ಈ ರಚನೆಗೆ ನಿಜಕ್ಕೂ ಜೀವಂತ ಕಳೆ ತಂದಿವೆ. ದಸರಾ ದೀಪಾಲಂಕಾರ ಸಮಿತಿ ಹಾಗೂ ಚಾಮುಂಡೇಶ್ವರಿ ವಿದ್ಯುತ್ ಸರಬರಾಜು ನಿಗಮ ಒಟ್ಟಾಗಿ ಈ ವಿನೂತನ ಪರಿಕಲ್ಪನೆಯನ್ನು ಜನರಿಗೆ ಪರಿಚಯಿಸಿವೆ.
ರಾತ್ರಿಯ ವೇಳೆಯಂತೂ ಬಣ್ಣ ಬಣ್ಣದ ವಿದ್ಯುತ್ ದೀಪಗಳ ಬೆಳಕಿನಲ್ಲಿ ಕಂಗೊಳಿಸುವ ಈ ರಥವನ್ನು ನೋಡಿದರೆ, ಕೃಷ್ಣಾರ್ಜುನರ ದಿವ್ಯ ರಥವೇ ನೇರವಾಗಿ ಭೂಮಿಗೆ ಇಳಿದು ಬಂದಂತೆ ಭಾಸವಾಗುತ್ತದೆ. ದಸರಾ ದೀಪಾಲಂಕಾರದ ವಿಶೇಷ ಅಂಗವಾಗಿ ಈ ಬೆಳಕಿನ ವೈಭವವು ಅಕ್ಟೋಬರ್ 11ರಿಂದ ಅಕ್ಟೋಬರ್ 21ರವರೆಗೆ ಸಾರ್ವಜನಿಕರ ಕಣ್ಣಿಗೆ ರಸದೌತಣ ನೀಡಲಿದೆ.
ಇನ್ನು ಮೈಸೂರಿನ ಚಾಮರಾಜೇಂದ್ರ ದೃಶ್ಯಕಲಾ ಅಕಾಡೆಮಿಯ ವಿದ್ಯಾರ್ಥಿ ಪುನೀತ್ ಮತ್ತು ಅವರ ಬಳಗದ ಕಲಾ ನೈಪುಣ್ಯತೆಯಲ್ಲಿ ಈ ರಥ ಮೂಡಿಬಂದಿದೆ. ಫ್ಯಾಬ್ರಿಕೇಶನ್ ಹಾಗೂ ಲೈಟಿಂಗ್ ಕೆಲಸಗಾರರು ಸೇರಿದಂತೆ ಸುಮಾರು 60ಕ್ಕೂ ಅಧಿಕ ನುರಿತ ಕಾರ್ಮಿಕರು ಕಳೆದ ಒಂದು ತಿಂಗಳಿಂದ ಹಗಲಿರುಳು ಶ್ರಮಪಟ್ಟು ಈ ಬೃಹತ್ ಕಲಾಕೃತಿಯನ್ನು ಸಿದ್ಧಪಡಿಸಿದ್ದಾರೆ. ಬನ್ನಿಮಂಟಪ ರಸ್ತೆಯ ಎಲ್‌ಐಸಿ ವೃತ್ತವು ಮೈಸೂರಿನ ಮುಖ್ಯ ಹೆಬ್ಬಾಗಿಲುಗಳಲ್ಲಿ ಒಂದಾಗಿರುವುದರಿಂದ, ಹೊರರಾಜ್ಯ ಹಾಗೂ ದೇಶ-ವಿದೇಶಗಳಿಂದ ಬರುವ ಲಕ್ಷಾಂತರ ಪ್ರವಾಸಿಗರನ್ನು ಸ್ವಾಗತಿಸುವ ಅಂದವನ್ನು ಇದು ಹೆಚ್ಚಿಸಿದೆ. ದಸರಾಗೆ ಬರುವ ಪ್ರತಿಯೊಬ್ಬರೂ ಈ ದಿವ್ಯ ದೃಶ್ಯವನ್ನು ಕಣ್ತುಂಬಿಕೊಳ್ಳುತ್ತಿದ್ದಾರೆ.
