ಇತ್ತೀಚಿನ ದಿನಗಳಲ್ಲಿ ರಖೈನ್ ರಾಜ್ಯದಲ್ಲಿ ಮಿಲಿಟರಿ ಆಡಳಿತ ಮತ್ತು ಸ್ಥಳೀಯ 'ಅರಾಕನ್ ಸೇನೆ' ನಡುವಿನ ಕದನ ತೀವ್ರಗೊಂಡಿದೆ. ಅರಾಕನ್ ಸೇನೆಯು ಅಲ್ಲಿನ 17 ಪಟ್ಟಣಗಳ ಪೈಕಿ 14 ಪಟ್ಟಣಗಳನ್ನು ಹಾಗೂ ಪ್ರಮುಖ ಸೇನಾ ನೆಲೆಗಳನ್ನು ತನ್ನ ವಶಕ್ಕೆ ಪಡೆದುಕೊಂಡಿದೆ. ಯುದ್ಧಭೂಮಿಯಲ್ಲಿ ಸತತ ಸೋಲು ಕಾಣುತ್ತಿರುವ ಮ್ಯಾನ್ಮಾರ್ ಸೇನೆ, ಹತಾಶೆಯಿಂದ ವೈಮಾನಿಕ ದಾಳಿಗಳನ್ನು ಹೆಚ್ಚಿಸಿದೆ.
ಇದರ ನಡುವೆ ಕ್ಯುಕ್ತಾವ್ ಪಟ್ಟಣದ ಜನನಿಬಿಡ ಮಾರುಕಟ್ಟೆಯ ಮೇಲೆ ಮಿಲಿಟರಿ ಫೈಟರ್ ಜೆಟ್ ಭೀಕರ ಬಾಂಬ್ ದಾಳಿ ನಡೆಸಿದೆ. ವ್ಯಾಪಾರ-ವಹಿವಾಟು ನಡೆಯುತ್ತಿದ್ದ ಸಮಯದಲ್ಲಿ ನಡೆದ ಈ ದಾಳಿಯಲ್ಲಿ 49 ಅಮಾಯಕ ನಾಗರಿಕರು ರಕ್ತದ ಮಡುವಿನಲ್ಲಿ ಪ್ರಾಣ ಕಳೆದುಕೊಂಡಿದ್ದಾರೆ ಮತ್ತು 58 ಕ್ಕೂ ಹೆಚ್ಚು ಜನ ತೀವ್ರವಾಗಿ ಗಾಯಗೊಂಡಿದ್ದಾರೆ. ಬಾಂಬ್ ಸ್ಫೋಟದ ರಭಸಕ್ಕೆ ಅಂಗಡಿ-ಮುಂಗಟ್ಟುಗಳು ಹೊತ್ತಿ ಉರಿದಿದ್ದು, ಹತ್ತಿರದ ಕಟ್ಟಡಗಳು ಹಾಗೂ ವಾಹನಗಳು ಸಂಪೂರ್ಣ ಜಜ್ಜುಹೋಗಿವೆ.
ಸೇನೆಯು ರಖೈನ್ ಪ್ರದೇಶಕ್ಕೆ ಹೋಗುವ ಎಲ್ಲಾ ಹೆದ್ದಾರಿ, ಜಲಮಾರ್ಗ ಮತ್ತು ಸರಕು ಸಾಗಣೆ ರಸ್ತೆಗಳನ್ನು ಬಂದ್ ಮಾಡಿದೆ. ಪರಿಣಾಮವಾಗಿ ಲಕ್ಷಾಂತರ ಜನ ಸಾಮಾನ್ಯರು ಆಹಾರ, ಕುಡಿಯುವ ನೀರು ಮತ್ತು ಕನಿಷ್ಠ ಔಷಧಿಯೂ ಸಿಗದೆ ನರಕಯಾತನೆ ಅನುಭವಿಸುತ್ತಿದ್ದಾರೆ. ಜೀವಗಳನ್ನು ರಕ್ಷಿಸಬೇಕಾದ ಆಸ್ಪತ್ರೆಗಳ ಮೇಲೆಯೂ ಸೇನೆ ದಾಳಿ ಮಾಡುತ್ತಿರುವುದು ಅಲ್ಲಿನ ಭೀಕರತೆಗೆ ಸಾಕ್ಷಿ.
ತನ್ನ ನೆಲದಲ್ಲೇ ಹಿನ್ನಡೆ ಅನುಭವಿಸುತ್ತಿರುವ ಸೇನೆಯು ಸಾರ್ವಜನಿಕರ ಮೇಲೆ ದಾಳಿ ನಡೆಸಿ ಬೆದರಿಸಲು ನೋಡುತ್ತಿದೆ ಎಂದು ಅರಾಕನ್ ಸೇನೆ ಆಕ್ರೋಶ ವ್ಯಕ್ತಪಡಿಸಿದೆ. ಅಮಾಯಕರ ಹತ್ಯೆಗೆ ಸೂಕ್ತ ಪ್ರತೀಕಾರ ತೀರಿಸಿಕೊಳ್ಳುವುದಾಗಿ ಎಚ್ಚರಿಸಿದ್ದು, ಮ್ಯಾನ್ಮಾರ್‌ನ ಈ ರಕ್ತಸಿಕ್ತ ಅಧ್ಯಾಯ ಯಾವಾಗ ಮುಗಿಯುತ್ತದೆ ಎಂಬ ಆತಂಕ ಜಗತ್ತನ್ನು ಕಾಡುತ್ತಿದೆ.
