ಕೇಂದ್ರ ಸರ್ಕಾರವು ಟೋಲ್ ಪ್ಲಾಜಾ ಇರುವ ಪ್ರದೇಶದ ಆಧಾರದ ಮೇಲೆ ವಾರ್ಷಿಕ ಪಾಸ್‌ಗೆ ಎರಡು ವಿಭಿನ್ನ ದರಗಳನ್ನು ನಿಗದಿಪಡಿಸಿದೆ. ಗ್ರಾಮೀಣ ಪ್ರದೇಶದ ಟೋಲ್ ಪ್ಲಾಜಾಗಳಿಗೆ ವಾರ್ಷಿಕ ₹1,500 ಹಾಗೂ ನಗರಸಭೆ ಅಥವಾ ಪುರಸಭೆ ವ್ಯಾಪ್ತಿಯ ಟೋಲ್ ಪ್ಲಾಜಾಗಳಿಗೆ ವಾರ್ಷಿಕ ₹3,000 ದರ ನಿಗದಿಪಡಿಸಿದೆ.
ಈ ಯೋಜನೆಯಿಂದ ಪ್ರತಿದಿನ ಟೋಲ್ ಪ್ಲಾಜಾ ದಾಟುವ ಸ್ಥಳೀಯ ವಾಹನ ಸವಾರರಿಗೆ ಆರ್ಥಿಕವಾಗಿ ಅನುಕೂಲವಾಗಲಿದೆ. ಈ ಹಿಂದೆ ತಿಂಗಳಿಗೆ ₹360ರ ಸ್ಥಳೀಯ ಪಾಸ್ ಪಡೆಯುತ್ತಿದ್ದವರು ವರ್ಷಕ್ಕೆ ಸುಮಾರು ₹4,320 ಪಾವತಿಸುತ್ತಿದ್ದರು. ಹೊಸ ಯೋಜನೆಯಡಿ ಗ್ರಾಮೀಣ ಪ್ರದೇಶದ ಟೋಲ್ ಪ್ಲಾಜಾಗಳಿಗೆ ₹1,500ರ ವಾರ್ಷಿಕ ಪಾಸ್ ಲಭ್ಯವಾದರೆ, ವರ್ಷಕ್ಕೆ ₹2,820ರವರೆಗೆ ಉಳಿತಾಯ ಮಾಡಲು ಸಾಧ್ಯವಾಗುತ್ತದೆ.
ನಗರ ವ್ಯಾಪ್ತಿಯ ಟೋಲ್ ಪ್ಲಾಜಾಗಳಿಗೆ ಅನ್ವಯಿಸುವ ₹3,000ರ ವಾರ್ಷಿಕ ಪಾಸ್ ದರದಲ್ಲಿಯೂ ಹಿಂದಿನ ₹4,320ರ ವಾರ್ಷಿಕ ವೆಚ್ಚಕ್ಕೆ ಹೋಲಿಸಿದರೆ ₹1,320 ಉಳಿತಾಯವಾಗಬಹುದು.
ಈ ಯೋಜನೆಯ ಪ್ರಯೋಜನ ಪಡೆಯಲು ವಾಹನ ಮಾಲೀಕರು ಕೆಲವು ಪ್ರಮುಖ ಅರ್ಹತೆ ಮತ್ತು ಷರತ್ತುಗಳನ್ನು ಪೂರೈಸಬೇಕು.
- 20 ಕಿಲೋಮೀಟರ್ ವ್ಯಾಪ್ತಿಯಲ್ಲಿ ವಾಸ: ಸಂಬಂಧಿತ ಟೋಲ್ ಪ್ಲಾಜಾದಿಂದ 20 ಕಿಲೋಮೀಟರ್ ವ್ಯಾಪ್ತಿಯೊಳಗೆ ವಾಸಿಸುತ್ತಿರಬೇಕು.
- ವಿಳಾಸದ ಪುರಾವೆ: ನಿಗದಿತ ವ್ಯಾಪ್ತಿಯಲ್ಲಿ ವಾಸಿಸುವುದನ್ನು ದೃಢಪಡಿಸಲು ಸೂಕ್ತ ವಿಳಾಸದ ದಾಖಲೆಗಳನ್ನು ಹೊಂದಿರಬೇಕು.
- ಖಾಸಗಿ ವಾಹನಗಳಿಗೆ ಮಾತ್ರ: ಈ ರಿಯಾಯಿತಿ ಸೌಲಭ್ಯ ವಾಣಿಜ್ಯೇತರ ಕಾರು, ಜೀಪ್ ಮತ್ತು ವ್ಯಾನ್‌ಗಳಿಗೆ ಮಾತ್ರ ಅನ್ವಯಿಸುತ್ತದೆ.
- ಸಿಂಧುವಾದ ಫಾಸ್ಟ್‌ಟ್ಯಾಗ್: ವಾಹನದಲ್ಲಿ ಸಕ್ರಿಯವಾಗಿರುವ ಮತ್ತು ಮಾನ್ಯವಾದ FASTag ಇರಬೇಕು.
- ನಿರ್ದಿಷ್ಟ ಟೋಲ್ ಪ್ಲಾಜಾಕ್ಕೆ ಮಾತ್ರ: ಪಾಸ್ ಪಡೆದ ಟೋಲ್ ಪ್ಲಾಜಾದಲ್ಲಿಯೇ ಈ ರಿಯಾಯಿತಿ ಅನ್ವಯಿಸುತ್ತದೆ.
ಇನ್ನು ಸ್ಥಳೀಯ ವಾರ್ಷಿಕ ಫಾಸ್ಟ್‌ಟ್ಯಾಗ್ ಪಾಸ್ ದೇಶದ ಎಲ್ಲಾ ರಾಷ್ಟ್ರೀಯ ಹೆದ್ದಾರಿಗಳಲ್ಲಿ ಬಳಸಬಹುದಾದ ಸಾರ್ವತ್ರಿಕ ಪಾಸ್ ಅಲ್ಲ. ಅರ್ಹ ವಾಹನ ಮಾಲೀಕರು ಯಾವ ನಿರ್ದಿಷ್ಟ ಟೋಲ್ ಪ್ಲಾಜಾಗೆ ಪಾಸ್ ಪಡೆಯುತ್ತಾರೋ, ಆ ಟೋಲ್ ಪ್ಲಾಜಾಕ್ಕೆ ಮಾತ್ರ ಈ ಸೌಲಭ್ಯ ಅನ್ವಯಿಸುತ್ತದೆ. ಆದ್ದರಿಂದ, ಪ್ರತಿದಿನ ಒಂದೇ ಟೋಲ್ ಪ್ಲಾಜಾವನ್ನು ದಾಟಿ ಪ್ರಯಾಣಿಸುವ ಸ್ಥಳೀಯ ನಿವಾಸಿಗಳಿಗೆ ಈ ಯೋಜನೆಯಿಂದ ಹೆಚ್ಚಿನ ಪ್ರಯೋಜನವಾಗುವ ಸಾಧ್ಯತೆಯಿದೆ.
ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯವು ‘ರಾಷ್ಟ್ರೀಯ ಹೆದ್ದಾರಿಗಳ ಶುಲ್ಕ ನಿಯಮಗಳು, 2026’ರ ಅಡಿಯಲ್ಲಿ ಈ ಬದಲಾವಣೆಯನ್ನು ಪ್ರಕಟಿಸಿದೆ ಎಂದು ನೀಡಲಾದ ಮಾಹಿತಿಯಲ್ಲಿ ತಿಳಿಸಲಾಗಿದೆ. ಈ ನಿಯಮಗಳು 2026ರ ನವೆಂಬರ್ 1ರಿಂದ ಜಾರಿಗೆ ಬರಲಿವೆ.
