ಸಾಮಾನ್ಯವಾಗಿ ದೊಡ್ಡ ಸ್ಟಾರ್‌ಗಳ ಸಿನಿಮಾಗಳು ರಿಲೀಸ್ ಆದರೆ ಹಳೆ ಸಿನಿಮಾಗಳನ್ನು ಥಿಯೇಟರ್‌ಗಳಿಂದ ತೆಗೆಯುವುದು ವಾಡಿಕೆ. ಆದರೆ ಪ್ರೇಮದ ಊರಲಿ ಸಿನಿಮಾಗೆ ಸಿಗುತ್ತಿರುವ ಜನಮೆಚ್ಚುಗೆ ಮತ್ತು ಮುಗಿಯದ ಟಿಕೆಟ್ ಬೇಡಿಕೆಯನ್ನು ನೋಡಿ ಥಿಯೇಟರ್ ಮಾಲೀಕರೇ ಬೆರಗಾಗಿದ್ದಾರೆ. ಭರ್ಜರಿ ಕಲೆಕ್ಷನ್ ಕಾರಣದಿಂದ ಈ ಸಿನಿಮಾವನ್ನು ತೆಗೆಯಲು ಯಾರೂ ಧೈರ್ಯ ಮಾಡುತ್ತಿಲ್ಲ.
ವಿಶೇಷವೆಂದರೆ ಹಳ್ಳಿ ಹಳ್ಳಿಗಳಿಂದ ಜನರು ಟ್ರ್ಯಾಕ್ಟರ್, ಟೆಂಪೋ ಹಾಗೂ ಬಸ್‌ಗಳಲ್ಲಿ ಗುಂಪು ಗುಂಪಾಗಿ ಬಂದು ಈ ಸಿನಿಮಾ ನೋಡುತ್ತಿದ್ದಾರೆ. ಬುಕ್‌ಮೈಶೋ ಇತಿಹಾಸದಲ್ಲೇ ಹಿಂದೆಂದೂ ಕಾಣದ ದಾಖಲೆಯೆಂಬಂತೆ, ಅಕ್ಟೋಬರ್ 12ರ ಒಂದೇ ದಿನ ಬರೋಬ್ಬರಿ 1.49 ಲಕ್ಷ ಟಿಕೆಟ್‌ಗಳು ಮಾರಾಟವಾಗುವ ಮೂಲಕ ಈ ಸಿನಿಮಾ ಇಡೀ ಭಾರತದಲ್ಲೇ ನಂಬರ್ 1 ಸ್ಥಾನ ಪಡೆದಿತ್ತು. ಜೈಲರ್ 2 ಬಿಡುಗಡೆಯಾಗಿದ್ದರೂ ಸಹ, ಬುಕ್‌ಮೈಶೋನಲ್ಲಿ ಪ್ರೇಮದ ಊರಲಿ ಚಿತ್ರಕ್ಕೆ ಭರ್ಜರಿ ಬೇಡಿಕೆಯಿದ್ದು, ಪ್ರತೀ ಗಂಟೆಗೆ ಸಾವಿರಾರು ಟಿಕೆಟ್‌ಗಳು ಬುಕ್ ಆಗುತ್ತಿವೆ. ಬಿಗ್ ಸ್ಟಾರ್ಸ್ ಸಿನಿಮಾಗಳ ಪೈಪೋಟಿ ಇದ್ದರೂ ಸಹ, ಬುಕ್‌ಮೈಶೋ ಟ್ರೆಂಡಿಂಗ್ ಹಾಗೂ ಒಟ್ಟಾರೆ ಸೀಟ್ ಆಕ್ಯುಪೆನ್ಸಿಯಲ್ಲಿ ಪ್ರೇಮದ ಊರಲಿ ಚಿತ್ರವೇ ಮುಂಚೂಣಿಯಲ್ಲಿದೆ.
ಕೇವಲ ಮನರಂಜನೆ ಮಾತ್ರವಲ್ಲದೆ, ಕನ್ನಡಿಗರ ಮನಸ್ಸಿಗೆ ಹತ್ತಿರವಾಗುವಂತಹ ಸುಂದರ ಭಾವನೆಗಳನ್ನು ಹೊತ್ತು ಬಂದಿರುವ ಈ ಸಿನಿಮಾ ಈಗಾಗಲೇ 50 ಕೋಟಿ ರೂ.ಗಳಿಗೂ ಅಧಿಕ ಕಲೆಕ್ಷನ್ ಮಾಡಿದೆ. ಅತಿ ಶೀಘ್ರದಲ್ಲೇ 100 ಕೋಟಿ ಕ್ಲಬ್ ಸೇರುವ ಮೂಲಕ ಹೊಸ ಇತಿಹಾಸ ಬರೆಯಲು ಸಜ್ಜಾಗಿದೆ. ಪರಭಾಷೆಯ ದೊಡ್ಡ ಸಿನಿಮಾಗಳ ಸುಳಿಯಲ್ಲೂ ಕನ್ನಡಿಗರು ತಮ್ಮ ನೆಲದ ಒಳ್ಳೆಯ ಕಂಟೆಂಟ್ ಅನ್ನು ಹೇಗೆ ಬೆಂಬಲಿಸುತ್ತಾರೆ ಎಂಬುದಕ್ಕೆ ಪ್ರೇಮದ ಊರಲಿ ಸಿನಿಮಾದ ಈ ಗೆಲುವೇ ಅಳಿಸಲಾಗದ ಉದಾಹರಣೆಯಾಗಿದೆ.
